Veurjaors- en insjtallasiefees – 27 meert 2022
In november koosj ’t neit doorgaon, mèr noe eindelik waal. Meer dan 70 persone hawwe zich aangemèldj veur dit feeske bie George’s. Eine kleinere gróp góng zelfs veuraaf mit de Kolleberg op veur ’t Krombroodrape. Leuk óm dit weier mit te mage make.
Nao veir oer waar jederein in de feeszaal aanwezig en woorte de nuu senatore, Roger Binten en Geert Kessels, geïnsjtalleierd. Nao ein krèftig Hoog ’t Rood, Gael en Gruin, woorte zie gefilleseteierd door alle senatore en dames.
Ouch woort deze daag wie gebroekelik ’t sjilderie aan de awd-sjtadsprins Thierry I aangebao. Sjilder Jan Ruigt haw der weier gèt sjoons van gemaak.
Senator Cor Baltis vertelde nog euver zien – same mit Ari Jansberg en Piet Deeder – twee keer 11 jaorig lidmaatsjap van de Senaat.
Tot sjlot woort preezedent Jack van Oorschot door de vice-preezedent gedekoreierd mit ein zilvere sjpang vanwaege zien verdeinste veur de senaat. Nao bekans 21 jaore geit oppe veurjaorsvergadering van 24 mei 2022 de veurzittesjhamer nao zien opvolger Louis Vahsen.
Veer kieke trök op eine sjone en gesjlaagde daag en jederein góng mit ein goud gevuil op hoes aan. Zeker és me dan te heure krig van eine senator dat zien riebewies weier veur 5 jaor is verlengd en deze senator 94 jaor jónk is!!!
